గెలాక్టోరియా: అర్థం, లక్షణాలు, కారణాలు

గెలాక్టోరియా అంటే మహిళ చనుమొనల నుంచి పాలలాంటి ద్రవం కారడం. కొత్తగా తల్లైన మహిళలు నవజాత శిశువుకు తల్లిపాలు ఇచ్చే సమయంలో కాకుండా.. ఇతర సందర్భాల్లో ఇలా జరుగుతుంది. ఇది వ్యాధి కాదు. కానీ వ్యాధికి సంకేతం కావచ్చు. ఇప్పటివరకు సంతానం కలగని మహిళలకు, మోనోపాజ్ దశలోకి వెళ్తున్నవారికి ఇలా జరుగుతుంది. ఈ పరిస్థితి పురుషుల్లో, పిల్లల్లో కూడా వస్తుంది. శరీరంలో గెలాక్టోరియా రావడానికి అనేక కారణాలు ఉంటాయి.

గెలాక్టోరియా అంటే ఏంటీ?

తల్లిపాలిస్తున్న సమయంలో కాకుండా.. ఇతర సందర్భాల్లో రొమ్ము నుంచి పాలు వస్తుండటాన్నే గెలాక్టోరియా అంటారు. శరీరంలో ప్రొలాక్టిన్ హార్మోన్ ఎక్కువగా ఉత్పత్తి అయిన సందర్భంలో ఇలా జరుగుతుంది. ఈ హార్మోన్ క్షీర గ్రంథుల నుంచి పాలు ఉత్పత్తి చేసి, విడుదల చేస్తుంది. కొన్నిసార్లు, గెలాక్టోరియా రావడానికి కారణాలు అస్పష్టంగా ఉంటాయి. అనేక సందర్భాల్లో.. ఇది దానంతట అదే తగ్గిపోతుంది.

రొమ్ము అధికంగా ప్రేరణ పొందడం, కొన్ని మందుల దుష్ప్రభావాల వల్ల కూడా గెలాక్టోరియా రావొచ్చు. పాల ఉత్పత్తిని ప్రేరేపించే ప్రొలాక్టిన్ అధిక స్థాయిలో ఉన్నప్పుడు కూడా గెలాక్టోరియా వస్తుంది.

గెలాక్టోరియా లక్షణాలు

గెలాక్టోరియాకు ప్రధాన లక్షణాలు చూస్తే:

1. చనుమొన నుంచి అప్పుడప్పుడు లేదా తరచూ పాలు కారుతుండటం- ఈ డిజార్డర్ తీవ్రతను బట్టి, పాలు కారడం తరచూ జరగొచ్చు లేదా చనుమొనల్ని పిండినప్పుడు జరగొచ్చు. ఈ పరిస్థితి మహిళలతో పాటు, పురుషుల్లో కూడా ఉంటుంది.
2. ఒక రొమ్ము లేదా రెండు రొమ్ములపై ప్రభావం చూపించి, పాలు కారవచ్చు.
3. రుతుచక్రం సక్రమంగా లేకపోవడం లేదా అసలే లేకపోవడం – ప్రోలాక్టిన్ స్థాయిలు ఎక్కువగా ఉండటం వల్ల ప్రొజెస్టిరాన్, ఈస్ట్రోజెన్ లాంటి హార్మోన్లు సాధారణంగా ఉత్పత్తి కావడాన్ని నిరోధిస్తుంది. ఫలితంగా ఇది అండోత్సర్గాన్ని ఆపడం లేదా మార్చడానికి కారణమవుతుంది. దీని వల్ల రుతుచక్రం ఆగిపోతుంది లేదా సక్రమంగా ఉండదు.
4. తలనొప్పి లేదా కంటి చూపు సమస్యలు.
5. ఈ సమస్యలు కాకుండా మీకు యోని దగ్గర పొడిగా అనిపించడం, శృంగారంపై ఆసక్తి తగ్గడం లాంటి లక్షణాలు కూడా ఉంటాయి. మీరు పురుషులు అయితే.. గెలక్టోరియా బారినపడితే మీరు అంగస్తంభన సమస్యల్ని కూడా ఎదురుకోవచ్చు. కొన్ని సందర్భాల్లో మీ ఛాతీ లేదా గడ్డంపై మొటిమలు కనిపించడం, జుట్టు పెరగడం లాంటి మార్పులు కూడా చూడొచ్చు.
6. ఈ లక్షణాల తీవ్రతను బట్టి, మీరు వైద్యుల్ని సంప్రదించాలి. గెలాక్టోరియాకు చికిత్స చేయొచ్చు. ఇది ప్రాణాంతకం ఏమీ కాదు. సరైన మందులతో సులువుగా చికిత్స చేయొచ్చు.

గెలాక్టోరియా కారణాలు

పిట్యూటరీ గ్రంథిపై ఉండే నిరపాయమైన కణితి, గెలాక్టోరియాకు ప్రధాన కారణం. ప్రోలాక్టిన్ అధికంగా ఉత్పత్తి కావడమే ఈ కణితి రావడానికి కారణం. ఫలితంగా పాలనాళాలు ఏర్పడి, పాలను ఉత్పత్తి చేస్తాయి. ఈ హార్మోన్ పాలు ఉత్పత్తి చేయాల్సిన అవసరం ఉందని మీ శరీరాన్ని నమ్మేలా చేస్తుంది. పాలను విడుదల చేస్తుంది. మరిన్ని కారణాలు ఇవే:

• గర్భనిరోధక మాత్రలు, రక్తపోటు మందులు లేదా యాంటిడిప్రెసెంట్స్‌ తీసుకోవడం.
• శృంగారంలో పాల్గొన్నప్పుడు లేదా రొమ్ము స్వీయ పరీక్ష చేసినప్పుడు రొమ్ములను ఎక్కువగా ప్రేరేపించడం.
• థైరాయిడ్ సమస్యలు.
• దీర్ఘకాలిక కిడ్నీ వ్యాధి.
• మెంతులు లేదా సోంపు గింజలు లాంటి హెర్బల్ సప్లిమెంట్స్ తీసుకోవడం.
• ఓపియాడ్లను ఉపయోగించడం. ఇది మీ శరీరాన్ని ఉత్తేజపర్చి, నాడీ వ్యవస్థను అణచివేస్తుంది.
• వెన్నెముకకు గాయం కావడం వల్ల శరీరంలో మార్పులు జరిగి గెలాక్టోరియాకు దారితీస్తుంది.

ఎవరిపై ప్రభావం చూపిస్తుంది?

గెలాక్టోరియా ఎక్కువగా పునరుత్పత్తి వయస్సులో ఉన్న మహిళలపై ప్రభావం చూపిస్తుంది. కొన్ని సందర్భాల్లో పురుషులపైనా ప్రభావం ఉంటుంది. హార్మోన్ల అసమతుల్యతకు గెలాక్టోరియా అభివృద్ధి సంకేతం. ఇలాంటి పరిస్థితుల్లో.. మీరు గైనకాలజిస్ట్ లేదా సెక్సాలజిస్టును సంప్రదించాలి. గెలాక్టోరియా బారినపడటం ప్రాణాంతకం కాదు. కానీ ఇబ్బందికరంగా ఉంటుంది.

అయితే శుభవార్త ఏంటంటే ఈ పరిస్థితికి చికిత్స ఉంది. మీరు ఈ పరిస్థితిని ఎదుర్కొంటున్నట్టైతే వైద్యుల్ని సంప్రదించేవరకు పాల ప్రవాహాన్ని నియంత్రించడానికి బ్రెస్ట్ ప్యాడ్‌లను ధరించవచ్చు. మీరు వైద్యుల దగ్గరకు వెళ్లినప్పుడు కూడా, పరిస్థితిని వివరించడానికి ఏమాత్రం ఇబ్బంది పడకూడదు.

చాలా కేసుల్లో.. ఇది కొన్ని రకాల మానసిక సమస్యలకు ముడిపడి ఉండవచ్చు. సరైన చికిత్స, కౌన్సెలింగ్‌తో బయటపడొచ్చు. నెమ్మదిగా పరిస్థితి చక్కబడుతుంది. ప్రసవంతో సంబంధం లేకుండా.. రొమ్ముల నుంచి పాలు బయటకు వస్తున్నట్టైతే వెంటనే వైద్యుల్ని సంప్రదించాలి.

మీకు ఇది కూడా నచ్చుతుంది: మహిళల్లో హార్మోనల్ ఇంబ్యాలెన్స్ అంటే ఏంటీ? దీన్ని ఎలా నయం చేయాలి?

గెలాక్టోరియా నిర్ధారణ

వైద్యులు పలు రకాలుగా గెలాక్టోరియాను నిర్ధారిస్తారు:

• చనుమొనల్ని, రొమ్ముల్ని పరీక్షించడం.
• ఆరోగ్య చరిత్రను సమీక్షించి, మీరు వాడుతున్న మందుల్ని పరిగణలోకి తీసుకోవడం.
• శరీరంలో ప్రొలాక్టిన్ లెవెల్స్‌ని నిర్ధారించేందుకు రక్తపరీక్ష చేయడం.
• బ్లడ్ శాంపిల్ తీసుకొని థైరాయిడ్ టెస్ట్ చేయడం.
• రొమ్ము కణజాలాన్ని తనిఖీ చేయడానికి, మామోగ్రామ్ లేదా అల్ట్రాసౌండ్ పరీక్షలు చేయడం.
• మీ పిట్యూటరీ గ్రంథిలో లేదా దానికి దగ్గరగా ఉన్న కణితిని తనిఖీ చేయడానికి, సీటీ స్కాన్, ఎంఆర్ఐ లాంటి ఇమేజింగ్ విధానాలు సిఫార్సు చేయడం.

మీకు ఇది కూడా నచ్చుతుంది: గర్భధారణ సమయంలో రీయూజబుల్ నర్సింగ్ ప్యాడ్‌లను ఉపయోగించడం సురక్షితమేనా?

చివరి మాట

గెలాక్టోరియా అసౌకర్యంగా ఉన్నా, ఈ వ్యాధి ప్రాణాపాయం కాదు. చికిత్సతో ఈ పరిస్థితి మెరుగు అవుతుంది. గెలాక్టోరియా సాధారణ పరిస్థితి. కాబట్టి మీకు గెలాక్టోరియా లక్షణాలు ఉన్నట్టైతే వైద్యసాయం పొందడానికి ఏమాత్రం వెనకాడవద్దు.